સાઉદી અરેબિયામાં ડ્રોન અને મિસાઇલ હુમલા બાદ રિયાધમાં સ્થિતિ ગંભીર છે. ભારતીય એમ્બેસીએ ભારતીયો માટે સુરક્ષા એડવાઇઝરી જાહેર કરી છે, જ્યારે IndiGo, Air India અને Akasa Air એ ફ્લાઇટ્સ રદ કરી છે.
રિયાધમાં સ્થિત ભારતીય એમ્બેસીએ સાઉદી અરેબિયામાં રહેતા તમામ ભારતીય નાગરિકો માટે એક તાત્કાલિક સુરક્ષા એડવાઇઝરી જારી કરી છે. કિંગ ખાલિદ ઇન્ટરનેશનલ એરપોર્ટ સહિતના વિસ્તારોમાં થયેલા હુમલાઓમાં જાનહાનિના અહેવાલો બાદ આ નિર્ણય લેવામાં આવ્યો છે. ભારતીય મિશને નાગરિકોને અત્યંત સાવચેત રહેવા અને સુરક્ષા પ્રોટોકોલનું ચુસ્તપણે પાલન કરવા સૂચના આપી છે.
એવિએશન સેક્ટર પર મોટી અસર
આ અસ્થિરતાને કારણે ભારત અને સાઉદી અરેબિયા વચ્ચેની હવાઈ મુસાફરી ખોરવાઈ ગઈ છે. Air India, Air India Express અને IndiGo જેવી મોટી કંપનીઓએ 24 ઓક્ટોબર સુધી રિયાધ માટેની પોતાની તમામ ફ્લાઇટ્સ રદ કરી દીધી છે. આ ઉપરાંત, Akasa Air એ પણ 27 ઓક્ટોબર સુધી સાઉદી નેટવર્ક પર પોતાની સેવાઓ સસ્પેન્ડ કરી છે. જોકે દમ્મામ, જેદ્દાહ અને મદીનાના એરપોર્ટ કાર્યરત છે, તેમ છતાં ભારત સરકાર દ્વારા હાલ બિન-જરૂરી મુસાફરી ટાળવાની સલાહ આપવામાં આવી છે.
સુરક્ષા માટે નવી ગાઇડલાઇન
એમ્બેસીએ સ્પષ્ટ કર્યું છે કે સુરક્ષા એલર્ટ દરમિયાન નાગરિકો ઘર કે ઓફિસના અંદરના રૂમમાં રહે, બારી કે કાચથી દૂર રહે અને ઊંચી ઇમારતો કે પુલની નજીક ન જાય. સુરક્ષા સ્થિતિને જોતા ઘટનાઓના ફોટા કે વીડિયો સોશિયલ મીડિયા પર શેર કરવા પર પણ પ્રતિબંધ મૂકવામાં આવ્યો છે.
ઇમરજન્સી હેલ્પલાઇન
જે ભારતીય નાગરિકોને તાત્કાલિક મુસાફરી કરવી જરૂરી છે, તેમને બહેરીન, કુવૈત અથવા કતારના રૂટનો ઉપયોગ કરવાની સલાહ આપવામાં આવી છે. મદદ માટે રિયાધ અને જેદ્દાહમાં 24 કલાક કાર્યરત કંટ્રોલ રૂમ સક્રિય કરી દેવામાં આવ્યા છે.