ઘણા પ્રવાસીઓ ટ્રાવેલ ઈન્સ્યોરન્સને માત્ર વિઝાની ફોર્માલિટી ગણે છે અને ઝીણી વિગતો વાંચતા નથી. સબ-લિમિટ્સ અને એજ-બેઝ્ડ એક્સક્લુઝન જેવી બાબતોને સમજવી અત્યંત જરૂરી છે, અન્યથા મેડિકલ કે ટ્રાવેલ ઇમરજન્સી સમયે મોટો આર્થિક ફટકો પડી શકે છે.
ઘણા ભારતીય પ્રવાસીઓ ટ્રાવેલ ઈન્સ્યોરન્સ લેતી વખતે તેને માત્ર વિઝા મેળવવાની એક સામાન્ય પ્રક્રિયા માને છે. જો કે, માત્ર 'ટોટલ સમ ઈન્સ્યોર્ડ' (Total Sum Insured) ના આંકડા પર ભરોસો રાખીને પોલિસી લેવી ભારે પડી શકે છે. જ્યારે અચાનક કોઈ મેડિકલ ઇમરજન્સી આવે, ત્યારે ક્લેમ મંજૂર થશે કે નહીં, તેનો આધાર પોલિસીના તે પાના પર હોય છે જેને આપણે વાંચવાની તસ્દી લેતા નથી.
સબ-લિમિટનો ફાંસો (The Sub-Limit Trap)
વીમા કંપનીઓ ઘણીવાર $50,000 કે $100,000 જેવી મોટી કવરેજ રકમ બતાવે છે, પરંતુ આખી રકમ દરેક ખર્ચ માટે ઉપલબ્ધ હોતી નથી. ઇન્શ્યોરન્સ કંપનીઓ હોસ્પિટલના રૂમ રેન્ટ, ICU ચાર્જ અને સર્જરી જેવી સેવાઓ પર ચોક્કસ 'કેપ' (Cap) રાખતી હોય છે. જો તમે મોંઘા દેશમાં સારવાર કરાવો અને તમારું બિલ રૂમ રેન્ટની લિમિટ કરતા વધારે હોય, તો બાકીના પૈસા ખિસ્સામાંથી ભરવા પડશે, જેનો આંકડો હજારો ડોલર સુધી પહોંચી શકે છે.
ઉંમર અને સ્વાસ્થ્યના નિયમો
ટ્રાવેલ ઈન્સ્યોરન્સ માર્કેટમાં ઉંમરના આધારે કવરેજ બદલાતું રહે છે. સામાન્ય રીતે 50 કે 60 વર્ષની ઉંમર પછી કંપનીઓ કડક શરતો લાગુ કરે છે, જેમાં કવરેજ ઘટાડવું અથવા કો-પેમેન્ટ (Co-payment) જેવી શરતોનો સમાવેશ થાય છે. આ ઉપરાંત, પ્રી-એક્ઝિસ્ટિંગ બીમારીઓ (Pre-existing diseases) માટે મોટાભાગની પોલિસીમાં કવરેજ મળતું નથી અથવા તેના માટે વધારાનું પ્રીમિયમ ચૂકવવું પડે છે.
ક્રેડિટ કાર્ડનું વીમા કવચ
ઘણા લોકો પ્રીમિયમ ક્રેડિટ કાર્ડ સાથે મળતા કોમ્પ્લીમેન્ટરી ટ્રાવેલ ઈન્સ્યોરન્સ પર આધાર રાખે છે. જોકે આ સુવિધા સગવડભરી લાગે છે, પણ તેમાં ઘણીવાર મર્યાદિત કવરેજ હોય છે. ફ્લાઇટમાં મોડું થવું કે કેન્સલેશન જેવી બાબતોમાં ચોક્કસ કારણો (જેમ કે ખરાબ હવામાન કે ટેકનિકલ ખામી) હોય તો જ ક્લેમ મળે છે. એડવેન્ચર સ્પોર્ટ્સ કે ક્રૂઝ ટ્રીપ જેવી ખાસ મુસાફરી માટે બેંકના વીમા કરતા અલગથી એક સ્પેશિયલાઇઝ્ડ ટ્રાવેલ પોલિસી લેવી હંમેશા સુરક્ષિત રહે છે.