વીમા ક્ષેત્રમાં ગ્રાહકો સાથે થતી છેતરપિંડી રોકવા માટે IRDAI કડક બન્યું છે. હવે ખોટી રીતે વીમા પોલિસી વેચનાર એજન્ટોનું નામ પબ્લિક ડેટાબેઝમાં જાહેર કરવામાં આવશે અને કમિશન પાછું ખેંચવાની જોગવાઈ પણ લાવવામાં આવશે.
ગ્રાહકોની સુરક્ષા માટે IRDAI નો માસ્ટર પ્લાન
વીમા નિયમનકાર IRDAI એ એક કન્સલ્ટેશન પેપર બહાર પાડ્યું છે, જેનો મુખ્ય હેતુ વીમા વિતરણમાં રહેલી ખામીઓને દૂર કરવાનો છે. હવે જે એજન્ટો ખોટી માહિતી આપીને પોલિસી વેચશે, તેમના નામ પબ્લિક રેકોર્ડ પર મૂકવામાં આવશે. આ પગલું એજન્ટોની જવાબદારી નક્કી કરવા અને ગ્રાહકોનો ભરોસો જીતવા માટે લેવામાં આવ્યું છે.
આ 12 પ્રકારની ગેરરીતિઓ પર રહેશે નજર
નવા નિયમો મુજબ, 12 એવી ચોક્કસ પ્રવૃત્તિઓ નક્કી કરવામાં આવી છે જે 'મિ-સેલિંગ' (Mis-selling) ગણાશે. જેમાં રેગ્યુલર પ્રીમિયમ પોલિસીને સિંગલ-પ્રીમિયમ તરીકે બતાવવી, સરન્ડર રિસ્ક છુપાવવી અને ગ્રાહકને યોગ્ય માહિતી આપ્યા વગર Unit Linked Insurance Plans (ULIP) વેચવા જેવી બાબતોનો સમાવેશ થાય છે. આ ઉપરાંત, જૂની પોલિસી બંધ કરાવી નવી પોલિસી પકડાવવી જેવી તરકીબો પર પણ લગામ કસાશે.
કમિશન પાછું ખેંચવાની તૈયારી (Claw-back Mechanism)
આ પ્રસ્તાવનું સૌથી મોટું પાસું 'કમિશન ક્લો-બેક' (Commission Claw-back) છે. જો કોઈ પોલિસી છેતરપિંડી દ્વારા વેચવામાં આવી હોવાનું સાબિત થશે, તો વીમા કંપનીઓએ એજન્ટને આપેલું કમિશન પાછું મેળવવું પડશે. આનાથી એજન્ટોનું ધ્યાન માત્ર કમિશન પર નહીં, પણ ગ્રાહકની જરૂરિયાત પર કેન્દ્રિત થશે.
રોકાણકારો માટે શું છે સંકેત?
આ ફેરફાર સીધી રીતે લાઇફ ઇન્સ્યોરન્સ સેક્ટરના 'પર્સિસ્ટન્સી રેશિયો' (Persistency Ratio) ને અસર કરશે. અત્યાર સુધી ઊંચા સરન્ડર રેટને કારણે કંપનીઓનો ખર્ચ વધતો હતો, પરંતુ હવે ગ્રાહકોનો વિશ્વાસ વધતા લાંબા ગાળે કંપનીઓની આવક વધુ સ્થિર રહી શકે છે. શરૂઆતના તબક્કે નવા બિઝનેસ ગ્રોથમાં થોડી સાવચેતી જોવા મળી શકે છે, પરંતુ લાંબા ગાળે આ સેક્ટર માટે વધુ સારો માહોલ બનશે.