USFDA એ Reliance Life Sciences ને ચેતવણી આપી છે. નવી મુંબઈ સ્થિત ફેસિલિટીમાં મેન્યુફેક્ચરિંગ ખામીઓ જોવા મળતા તેને ઈમ્પોર્ટ એલર્ટ હેઠળ મૂકવામાં આવી છે. કંપનીના ડેટા અને સ્ટેરિલિટી પ્રોટોકોલ પર સવાલો ઉઠ્યા છે.
શું છે સમગ્ર મામલો?
યુનાઈટેડ સ્ટેટ્સ ફૂડ એન્ડ ડ્રગ એડમિનિસ્ટ્રેશન (USFDA) દ્વારા Reliance Life Sciences Private Limited ને એક કડક વોર્નિંગ લેટર જારી કરવામાં આવ્યો છે. આ કાર્યવાહી નવી મુંબઈ સ્થિત મેન્યુફેક્ચરિંગ પ્લાન્ટના નિરીક્ષણ બાદ લેવામાં આવી છે. સપ્ટેમ્બર 2026 માં જાહેર થયેલા આ રિપોર્ટમાં કંપની પર 'કરન્ટ ગુડ મેન્યુફેક્ચરિંગ પ્રેક્ટિસ' (CGMP) ના નિયમોના ઉલ્લંઘનનો આરોપ છે.
નિરીક્ષણમાં શું બહાર આવ્યું?
ફેબ્રુઆરી 2026 માં કરવામાં આવેલી તપાસ દરમિયાન, USFDA ના અધિકારીઓને લેબોરેટરી રેકોર્ડ્સમાં ગંભીર ગેરરીતિઓ જોવા મળી હતી. કંપની ઉત્પાદનોની ગુણવત્તા અને સુરક્ષાના માપદંડો જાળવવામાં નિષ્ફળ રહી હોવાનું સામે આવ્યું છે. ખાસ કરીને ઈન્જેક્ટેબલ દવાઓની સુરક્ષા માટે જરૂરી એવા 'સ્ટેરિલ પ્રોસેસિંગ કંટ્રોલ'માં મોટી ખામીઓ જોવા મળી હતી.
નિકાસ પર પ્રતિબંધ અને તેની અસર
આ ખામીઓને કારણે, 9 જુલાઈ 2026 થી નવી મુંબઈ પ્લાન્ટમાં બનતી તમામ દવાની પ્રોડક્ટ્સ પર ઈમ્પોર્ટ એલર્ટ 66-40 લગાવી દેવામાં આવ્યું છે. આના પરિણામે હવે કંપની અમેરિકામાં દવાઓ મોકલી શકશે નહીં. આ પહેલા પણ જુલાઈ 2026 માં કંપનીએ અમેરિકી માર્કેટમાંથી કેન્સરની કેટલીક દવાઓ પાછી ખેંચવી પડી હતી.
નોંધનીય છે કે Reliance Life Sciences એક અનલિસ્ટ કંપની છે, તેથી શેરબજારમાં કોઈ ડાયરેક્ટ અસર જોવા મળશે નહીં. જોકે, કંપની માટે હવે અમેરિકી માર્કેટમાં ફરી પ્રવેશ મેળવવા માટે કડક સુધારા અને રિ-ઇન્સ્પેક્શન પાસ કરવા અનિવાર્ય બની ગયા છે.