કેન્દ્રીય સ્વાસ્થ્ય મંત્રાલયે રાજ્યોને સખત આદેશ આપ્યો છે કે હોસ્પિટલોમાં 'સિંગલ-યુઝ' મેડિકલ ડિવાઈસનો ફરી ઉપયોગ ન કરવો. આ નિર્ણયથી દર્દીઓની સુરક્ષા વધશે, પરંતુ હોસ્પિટલોના ખર્ચમાં વધારો થવાની શક્યતા છે.
હોસ્પિટલોના ઓપરેશનલ ખર્ચ પર અસર
આ આદેશની સૌથી મોટી અસર કાર્ડિયોલોજી, નેફ્રોલોજી, ઓન્કોલોજી અને ન્યુરોસર્જરી જેવા મોંઘા વિભાગો પર પડશે. અત્યાર સુધી ઘણી હોસ્પિટલો ઓપરેશનલ ખર્ચ ઘટાડવા માટે સિંગલ-યુઝ વસ્તુઓને સ્ટરિલાઈઝ કરીને ફરીથી ઉપયોગ કરતી હતી. હવે દરેક પ્રક્રિયા માટે નવી ડિવાઈસ વાપરવી ફરજિયાત બનતા હોસ્પિટલોના ખર્ચમાં સીધો વધારો થશે. જો હોસ્પિટલો આ વધેલો ખર્ચ દર્દીઓ કે વીમા કંપનીઓ પર નહીં નાખી શકે, તો તેમના ઓપરેટિંગ પ્રોફિટ માર્જિન પર ચોક્કસપણે દબાણ જોવા મળશે. આગામી ક્વાર્ટરના પરિણામોમાં હોસ્પિટલ ચેઈન્સના ખર્ચમાં થતો વધારો રોકાણકારો માટે મહત્વનો રહેશે.
મેડિકલ ડિવાઈસ ઉત્પાદકો માટે તક
એક તરફ હોસ્પિટલો માટે પડકાર છે, તો બીજી તરફ મેડિકલ ટેકનોલોજી કંપનીઓ માટે આ એક મોટી તક છે. નિયમ કડક બનતા હોસ્પિટલોએ હવે ફ્રેશ મેડિકલ કન્ઝ્યુમેબલ્સ ખરીદવા જ પડશે, જેનાથી આ સેક્ટરની કંપનીઓનું વેચાણ (Sales Volume) વધવાની પૂરી શક્યતા છે.
કાયદાકીય જોખમો અને નિયમો
સરકારે સ્પષ્ટ કર્યું છે કે નિયમોનું ઉલ્લંઘન કરનાર સામે Drugs and Cosmetics Act of 1940, Medical Devices Rules of 2017 અને Clinical Establishments Act of 2010 હેઠળ કડક કાર્યવાહી કરવામાં આવશે. Drugs Controller General of India (DCGI) રાજ્યના નિયંત્રકો સાથે મળીને તપાસ કરશે. જોકે, આ આદેશની વાસ્તવિક અસર તેના અમલીકરણ અને હોસ્પિટલો પર થતી દંડની કાર્યવાહી પર નિર્ભર રહેશે.