અમેરિકાએ H-1B વિઝાના નિયમોમાં કડક ફેરફારો કર્યા છે, જેની સીધી અસર ભારતીય IT કંપનીઓ પર પડશે. લેઓફ હિસ્ટ્રી અને ફીમાં વધારાને કારણે કંપનીઓના બિઝનેસ મોડલ સામે નવો પડકાર ઊભો થયો છે.
અમેરિકા સરકાર દ્વારા H-1B વિઝા પોલિસીમાં કરવામાં આવેલા ફેરફારોએ ભારતીય IT જગતની ચિંતા વધારી દીધી છે. નવા નિર્દેશો મુજબ, જે કંપનીઓ વિદેશી વર્કર્સને અમેરિકા લાવવા માંગે છે, તેમણે ત્યાંની ડોમેસ્ટિક લેઓફ (Layoff) હિસ્ટ્રી જાહેર કરવી પડશે. આનો મુખ્ય હેતુ અમેરિકન વર્કફોર્સને સુરક્ષિત રાખવાનો અને સ્થાનિક નોકરીઓ કપાઈ ન જાય તે જોવાનો છે.
વધારાનો ખર્ચ અને પડકારો
નવા નિયમ હેઠળ સપ્ટેમ્બર 2027 સુધી ચોક્કસ ઓફશોર H-1B અરજીઓ પર $1,00,000 સુધીની ફી નક્કી કરવામાં આવી છે. હાલમાં અમેરિકામાં મંજૂર થયેલા કુલ H-1B વિઝામાંથી અંદાજે 71% હિસ્સો ભારતીય પ્રોફેશનલ્સનો છે, જે આ સેક્ટરને સૌથી વધુ સંવેદનશીલ બનાવે છે. અત્યાર સુધી ભારતીય IT કંપનીઓ ભારતથી કુશળ પ્રોફેશનલ્સ મોકલીને કામ ચલાવતી હતી, જે તેમના માટે સસ્તું પડતું હતું.
લોકલ હાયરિંગનું દબાણ
ખર્ચ ઘટાડવા અને નિયમો પાળવા માટે હવે ઘણી કંપનીઓ અમેરિકામાં જ સ્થાનિક ટેલેન્ટને હાયર કરી રહી છે. જોકે, ત્યાં પગારનું ધોરણ ભારતના મુકાબલે ઘણું ઊંચું હોવાથી કંપનીઓના ઓપરેટિંગ માર્જિન પર ભારે દબાણ જોવા મળી શકે છે. જો કંપનીઓ આ બદલાવ સાથે તાલ નહીં મેળવી શકે, તો તેમની કામગીરીના ખર્ચમાં મોટો ઉછાળો આવી શકે છે.
આગામી ક્વાર્ટર્સમાં IT કંપનીઓના રિઝલ્ટ અને મેનેજમેન્ટની કોમેન્ટરી પર રોકાણકારોની ખાસ નજર રહેશે કે તેઓ આ વિઝાના અવરોધો વચ્ચે પોતાના નફાને કેવી રીતે સુરક્ષિત રાખે છે.