અમેરિકન માર્કેટમાં આજે ઘટાડો જોવા મળ્યો છે. AI ઇન્ફ્રાસ્ટ્રક્ચર પાછળના તોતિંગ ખર્ચ અંગે રોકાણકારોની ચિંતા અને ભૌગોલિક તણાવને લીધે ક્રૂડ ઓઈલના ભાવ રેકોર્ડ સ્તરે પહોંચતા વૈશ્વિક સેન્ટિમેન્ટ નબળું પડ્યું છે, જેની સીધી અસર ભારતીય બજારો પર પડી શકે છે.
અમેરિકન ફાઇનાન્શિયલ માર્કેટમાં આ અઠવાડિયે ભારે અસ્થિરતા જોવા મળી હતી. રોકાણકારો હવે સવાલ કરી રહ્યા છે કે શું આર્ટિફિશિયલ ઇન્ટેલિજન્સ (AI) પાછળ કરવામાં આવતો આટલો મોટો ખર્ચ લાંબો સમય ટકી શકશે? ડેટા સેન્ટર્સ બનાવવાનો ખર્ચ સતત વધી રહ્યો હોવાથી ખાસ કરીને ટેકનોલોજી શેરોમાં વેચવાલીનું દબાણ જોવા મળ્યું છે.
IT સેક્ટર પર કેવી અસર?
હવે તમામની નજર Alphabet, Microsoft અને Amazon ના આગામી ક્વોર્ટરલી પરિણામો પર છે. આ કંપનીઓ તેમના આગામી વર્ષના ખર્ચ અંગે શું પ્લાન રાખે છે તે ખૂબ મહત્વનું છે. ભારતીય રોકાણકારો માટે આ આંકડા જાણવા જરૂરી છે, કારણ કે જો આ ટેક જાયન્ટ્સ તેમના પ્રોજેક્ટ્સ ઘટાડશે, તો ભારતની મોટી IT કંપનીઓની આવક પર સીધી અસર પડી શકે છે.
ક્રૂડ ઓઈલ અને મોંઘવારીનું સંકટ
બીજી તરફ, મધ્ય પૂર્વમાં વધતા તણાવને કારણે ક્રૂડ ઓઈલના ભાવ રેકોર્ડ સ્તરે પહોંચ્યા છે. ભારત પોતાની જરૂરિયાતના મોટાભાગના તેલની આયાત કરે છે, જેથી તેલના વધતા ભાવ દેશમાં મોંઘવારી વધારી શકે છે અને કોર્પોરેટ માર્જિન પર દબાણ લાવી શકે છે.
Fed Meeting અને ટેલિકોમ સેક્ટર
આવતા બુધવારે US Federal Reserve ની બેઠક યોજાવાની છે. વ્યાજદરમાં સ્થિરતાની અપેક્ષા વચ્ચે, ડિસેમ્બર મહિના માટેની પોલિસીના સંકેતો પર સૌની નજર રહેશે. આ ઉપરાંત, SpaceX ની નવી વાયરલેસ સર્વિસના અહેવાલો બાદ AT&T અને T-Mobile જેવી કંપનીઓના શેરમાં મોટો ઘટાડો નોંધાયો છે, જે ટેલિકોમ સેક્ટરમાં નવા ખતરાના સંકેત આપે છે.