Taiwan ના રિટેલ રોકાણકારો AI શેરની તેજીમાં આંધળુકિયા કરી રહ્યા છે. પર્સનલ લોન, મોર્ગેજ અને માર્જિન ટ્રેડિંગના સહારે બજારમાં ઉતરેલા રોકાણકારો માટે જુલાઈ મહિનાનું કરેક્શન લાલબત્તી સમાન સાબિત થયું છે.
AI હાર્ડવેર અને સેમિકન્ડક્ટર સેક્ટરની તેજીએ Taiwan ના શેરબજારમાં રોકાણકારોની સંખ્યામાં જબરદસ્ત વધારો કર્યો છે. હાલમાં ત્યાં 1.47 કરોડ થી વધુ ટ્રેડિંગ એકાઉન્ટ્સ સક્રિય છે. વર્ષ 2026 ના પ્રથમ છ મહિનામાં TAIEX ઇન્ડેક્સ 59% ઉછળ્યો હતો, પરંતુ આ તેજી પાછળનું મોટું કારણ દેવું લઈને કરેલું રોકાણ છે.
શું છે 'ફોર લોન્સ' (Four Loans) વ્યૂહરચના?
સ્થાનિક રોકાણકારો હવે મોર્ગેજ, માર્જિન ફાઇનાન્સિંગ, પર્સનલ ક્રેડિટ અને કાર લોન જેવી સુવિધાઓનો ઉપયોગ કરીને શેરબજારમાં પૈસા લગાવી રહ્યા છે. સસ્તું ધિરાણ અને બેન્કો પાસે વધેલી રોકડ રકમને કારણે સામાન્ય લોકો માટે શેરબજારમાં મૂડી નાખવી સરળ બની છે. જોકે, TSMC જેવી કંપનીઓ પર વધુ પડતી નિર્ભરતા માર્કેટને ખૂબ જ વોલેટાઈલ બનાવી રહી છે.
ડિફોલ્ટમાં રેકોર્ડ વધારો
ખતરાની ઘંટડી ત્યારે વાગી જ્યારે જુલાઈના મધ્યમાં માર્કેટ માત્ર નવ સેશનમાં 12.5% તૂટી ગયું. આ ઘટાડાને કારણે માર્જિન કોલ આવ્યા અને રોકાણકારોએ ફરજિયાત શેર વેચવા પડ્યા, જેનાથી માર્કેટમાં વેચવાલીનું દબાણ વધ્યું છે. જૂન 2026 માં શેર ટ્રેડિંગને લગતા ડિફોલ્ટ આંકડો NT$2 અબજ ને પાર કરી ગયો છે, જે વર્ષ 2019 પછીનો સૌથી મોટો આંકડો છે.
કેન્દ્રીય બેંકની ચેતવણી
Taiwan ની સેન્ટ્રલ બેંકે નાગરિકોને ચેતવણી આપી છે કે દેવું કરીને શેરબજારમાં સટ્ટો રમવો જોખમી છે. સેમિકન્ડક્ટર સેક્ટરની હાલત પર બજારનો સંપૂર્ણ આધાર રહેલો હોવાથી, વૈશ્વિક આર્થિક અનિશ્ચિતતા આ રોકાણકારો માટે મોટો પડકાર બની શકે છે.