લદ્દાખમાં 'Hill Development Councils (Amendment) Regulation 2026' લાગુ કરવામાં આવ્યું છે, જેના હેઠળ હવે તમામ 8 જિલ્લાઓને સ્વાયત્ત કાઉન્સિલનો દરજ્જો મળશે. આ નિર્ણયથી સ્થાનિક ગવર્નન્સ અને ઈન્ફ્રાસ્ટ્રક્ચર પ્રોજેક્ટ્સમાં ઝડપ આવશે.
લદ્દાખના વહીવટી માળખામાં એક મોટું પરિવર્તન આવ્યું છે. 16 ઓક્ટોબર, 2026 ના રોજ રાષ્ટ્રપતિની મંજૂરી બાદ, લેફ્ટનન્ટ ગવર્નર વિનય કુમાર સક્સેનાએ સત્તાવાર રીતે લદ્દાખ ઓટોનોમસ હિલ ડેવલપમેન્ટ કાઉન્સિલ (એમેન્ડમેન્ટ) રેગ્યુલેશન, 2026 જાહેર કર્યું છે. આનાથી હવે કેન્દ્રશાસિત પ્રદેશના તમામ 8 જિલ્લાઓમાં સમર્પિત કાઉન્સિલ કાર્યરત થશે.
સ્થાનિક સ્તરે સત્તાનું વિકેન્દ્રીકરણ
આ નિર્ણયનો મુખ્ય ઉદ્દેશ્ય શાસનને ગ્રાસરૂટ લેવલ સુધી પહોંચાડવાનો છે. શામ, નુબ્રા, ચાંગથાંગ, ઝંસ્કાર અને સાંકૂ જેવા નવા બનેલા વિસ્તારોમાં કાઉન્સિલ બનવાથી ઈન્ફ્રાસ્ટ્રક્ચર, ટૂરિઝમ અને બોર્ડર કનેક્ટિવિટીના કામોમાં વધુ સારી દેખરેખ રાખી શકાશે. સ્થાનિક સ્તરે નિર્ણય લેવાની પ્રક્રિયા ઝડપી બનવાથી આર્થિક ગતિવિધિઓને પણ વેગ મળશે.
બેઠકો અને માળખામાં ફેરફાર
નવા નિયમો મુજબ, કાઉન્સિલની બેઠકોની સંખ્યામાં પણ ફેરફાર કરાયા છે. અગાઉ મહત્તમ 26 બેઠકો હતી, જે હવે 7 થી 24 ની વચ્ચે નક્કી કરવામાં આવી છે. આ સાથે મહિલાઓ અને અલ્પસંખ્યક સમુદાયોના પ્રતિનિધિત્વને સુનિશ્ચિત કરવા માટે 4 સભ્યોને નોમિનેટ કરવાની જોગવાઈ કરવામાં આવી છે.
રોકાણકારો અને વિકાસ પર અસર
19 ઓક્ટોબર, 2026 થી અમલમાં આવેલા આ નિયમોથી લદ્દાખમાં સરકારી યોજનાઓના અમલીકરણમાં સ્થિરતા આવશે. રોકાણકારો માટે આ એક સકારાત્મક સંકેત છે કારણ કે સ્થાનિક કાઉન્સિલની સક્રિયતા પ્રોજેક્ટ્સના ઝડપી અમલીકરણમાં મદદરૂપ સાબિત થશે.