India Meteorological Department (IMD) એ જણાવ્યું છે કે ચોમાસાની વિદાયમાં વિલંબ થયો છે. દેશના મધ્ય અને ઉત્તર ભાગોમાં ભારે વરસાદ ચાલુ રહેતા ખરીફ પાકની કાપણી અને લોજિસ્ટિક્સ પર તેની સીધી અસર જોવા મળી શકે છે.
વરસાદ ખેંચાતા વધ્યું ટેન્શન
ભારતીય હવામાન વિભાગ (India Meteorological Department) મુજબ, દર વર્ષે સપ્ટેમ્બરના મધ્યમાં થતી ચોમાસાની વિદાય આ વખતે લંબાઈ છે. પશ્ચિમ બંગાળ, ઝારખંડ અને ઓડિશાના દરિયાકાંઠાના વિસ્તારોમાં સક્રિય લો-પ્રેશર સિસ્ટમને કારણે મધ્ય અને ઉત્તર ભારતમાં હજુ પણ ભારે વરસાદ વરસી રહ્યો છે. વાતાવરણમાં ભેજનું પ્રમાણ વધુ હોવાને કારણે સૂકી હવા ફૂંકાવાનું શરૂ થયું નથી, જે ચોમાસાની વિદાય માટે જરૂરી છે.
રોકાણકારો માટે શું છે જોખમ?
આ લાંબા ચોમાસાની સીધી અસર ખરીફ પાક પર પડી રહી છે. જોકે, થોડો ભેજ પાક માટે સારો ગણાય, પરંતુ કાપણીના સમયે થતો અતિવૃષ્ટિ જેવો વરસાદ પાકની ગુણવત્તા બગાડી શકે છે, જેની સીધી અસર ફૂડ ઇન્ફ્લેશન (Food Inflation) પર પડી શકે છે.
ઈન્ફ્રાસ્ટ્રક્ચર અને લોજિસ્ટિક્સમાં અવરોધ
માત્ર ખેતી જ નહીં, પણ દિલ્હી, મધ્યપ્રદેશ, છત્તીસગઢ અને ઉત્તરાખંડ જેવા રાજ્યોમાં ભારે વરસાદને કારણે શહેરોમાં પાણી ભરાવાની સમસ્યા અને ટ્રાન્સપોર્ટેશનમાં વિલંબ જોવા મળી રહ્યો છે. આ પરિસ્થિતિને કારણે બાંધકામ અને સપ્લાય ચેઈન પ્રોજેક્ટ્સની કામગીરી ધીમી પડી શકે છે.
હવામાન વિભાગના નિયમ મુજબ, સતત ૫ દિવસ વરસાદ ન પડે અને વાતાવરણમાં ભેજનું પ્રમાણ ઘટે ત્યારે જ ચોમાસાની સત્તાવાર વિદાય ગણાય છે. હાલમાં આ સ્થિતિ ન હોવાથી માર્કેટ એનાલિસ્ટ્સ પણ આગામી સમયના વરસાદના આંકડા પર નજર રાખી રહ્યા છે.