ભારતનો Business Confidence Index નાણાકીય વર્ષ **2027** ના બીજા ક્વાર્ટરમાં ઉછળીને **107.8** પર પહોંચ્યો છે. એક વર્ષના સતત ઘટાડા બાદ આ આંકડો વધતા કંપનીઓમાં ઉત્સાહ જોવા મળી રહ્યો છે, જોકે રોજગાર અને મોંઘવારીને લઈને હજુ સાવચેતી છે.
ભારતીય કોર્પોરેટ જગતના સેન્ટિમેન્ટમાં મોટો બદલાવ જોવા મળ્યો છે. નેશનલ કાઉન્સિલ ઓફ એપ્લાઇડ ઇકોનોમિક રિસર્ચ (NCAER) ના રિપોર્ટ મુજબ, Business Confidence Index જે અગાઉના ક્વાર્ટરમાં 99.8 હતો, તે વધીને 107.8 પર પહોંચ્યો છે. સતત ચાર ક્વાર્ટરના ઘટાડા બાદ આ પહેલીવાર પોઝિટિવ ટ્રેન્ડ જોવા મળ્યો છે.
સેલ્સ અને એક્સપોર્ટમાં તેજી
આ રિકવરી પાછળનું મુખ્ય કારણ ઉત્પાદન અને ઓર્ડર્સમાં સુધારો છે. સર્વેમાં સામેલ અંદાજે 71% કંપનીઓ માને છે કે આગામી છ મહિનામાં સ્થાનિક વેચાણમાં ગ્રોથ જોવા મળશે, જે અગાઉના ક્વાર્ટરમાં 67% હતો. આ ઉપરાંત, એક્સપોર્ટ સેન્ટિમેન્ટમાં પણ સુધારો થયો છે, જેમાં 62.3% કંપનીઓ શિપમેન્ટ વધવાની અપેક્ષા રાખી રહી છે, જે અગાઉના 55.2% ના આંકડા કરતા વધુ છે.
હાયરિંગ અને પ્રાદેશિક સ્થિતિ
જોકે, કંપનીઓ ભરતી કરવા બાબતે હજુ પણ સાવચેત છે. ઓપરેશનલ કાર્યક્ષમતા વધારવા પર ભાર મૂકાઈ રહ્યો છે અને નવી ભરતી કરતા હાલના રિસોર્સનો મહત્તમ ઉપયોગ કરવા પર ધ્યાન છે. મોંઘવારી હજુ પણ એક પડકાર છે. જોકે કાચા માલના ખર્ચમાં થોડી રાહત મળી છે, પણ કિંમતોની સ્થિરતા અંગે ચિંતા યથાવત છે. પ્રાદેશિક રીતે જોઈએ તો, ઉત્તર અને પશ્ચિમ ભારતમાં ઉત્સાહ છે, પરંતુ પૂર્વ અને દક્ષિણ ભારતમાં સ્થિતિ હજુ નબળી જણાય છે.
રોકાણકારો માટે શું મહત્વનું?
હવે સૌથી મોટો સવાલ એ છે કે શું આ આત્મવિશ્વાસ વાસ્તવિક નફામાં પરિણમશે? કંપનીઓની કેપેસિટી યુટિલાઈઝેશન 93% થી વધુ છે, જેનો અર્થ છે કે આગામી સમયમાં નવી ક્ષમતા ઉભી કરવા માટે કંપનીઓએ મોટું કેપિટલ એક્સપેન્ડિચર (Capex) કરવું પડશે. રોકાણકારોએ હવે કંપનીઓના રિઝલ્ટ પર નજર રાખવી જોઈએ કે શું આ ઓપ્ટિમિઝમથી માર્જિન પર પોઝિટિવ અસર પડે છે કે નહીં.