All IITs Placement Committee (AIPC) એ કેમ્પસ પ્લેસમેન્ટ દરમિયાન ૧૫૦ થી વધુ જોબ ઓફર રદ કરનાર ૨૨ કંપનીઓ પર આગામી બે વર્ષ માટે પ્રતિબંધ મૂક્યો છે. આ લિસ્ટમાં Oracle જેવી મોટી કંપનીઓનો પણ સમાવેશ થાય છે.
પ્લેસમેન્ટમાં શિસ્ત લાવવા AIPC નો કડક નિર્ણય
All IITs Placement Committee (AIPC) એ એક મોટું અને કડક પગલું લેતા કુલ ૨૨ કંપનીઓને આગામી બે પ્લેસમેન્ટ સીઝન માટે કેમ્પસ રિક્રુટમેન્ટથી દૂર કરી દીધી છે. ૨૦૨૬ ના ગ્રેજ્યુએટ બેચ માટે કરવામાં આવેલી ૧૫૦ થી વધુ જોબ ઓફર્સ અચાનક પાછી ખેંચી લેવાતા આ નિર્ણય લેવાયો છે. આ પગલાનો મુખ્ય ઉદ્દેશ્ય ભારતની ટોચની એન્જિનિયરિંગ કોલેજોમાં પ્લેસમેન્ટની ગરિમા અને પારદર્શિતા જાળવી રાખવાનો છે.
કોના પર પડી ગાજ?
આ પ્રતિબંધિત કંપનીઓના લિસ્ટમાં ઘણી નાની અને મોટી કંપનીઓનો સમાવેશ થાય છે. ખાસ કરીને Oracle નું નામ સામે આવી રહ્યું છે, જેણે અંદાજે ૪૦ જેટલી ઓફર્સ રદ કરી હોવાનું જાણવા મળ્યું છે. IIT કેમ્પસમાંથી બેન થવાથી આ કંપનીઓ માટે ભવિષ્યમાં ટોચના એન્જિનિયરિંગ ટેલેન્ટને હાયર કરવું મુશ્કેલ બની શકે છે, જે ટેકનિકલ ટીમો બનાવવા માટે ખૂબ જ મહત્વનું છે.
શું આ કોઈ મોટા ફેરફારનો સંકેત છે?
આ ઘટના માત્ર ઓફર પાછી ખેંચવા પૂરતી સીમિત નથી, પરંતુ ટેક સેક્ટરમાં ચાલી રહેલા સાવચેતીભર્યા વાતાવરણને પણ દર્શાવે છે. આર્ટિફિશિયલ ઇન્ટેલિજન્સ (AI) અને ઓટોમેશનના કારણે કંપનીઓ પોતાની વર્કફોર્સ વ્યૂહરચના બદલી રહી છે. માર્કેટના જાણકારોના મતે, આવી રીતે ઓફર્સ કેન્સલ થવી એ કંપનીઓની આંતરિક કોસ્ટ-કટિંગ અથવા લિક્વિડિટીના દબાણનો સંકેત હોઈ શકે છે.
વિદ્યાર્થીઓનું શું?
AIPC એ આ કંપનીઓને પોતાની ભૂલ સુધારવા માટે ૧૫ સપ્ટેમ્બર સુધીની ડેડલાઈન આપી હતી, પરંતુ જે કંપનીઓ નિષ્ફળ રહી તેમના પર આ પ્રતિબંધ લાદવામાં આવ્યો છે. રાહતની વાત એ છે કે, ૨૦% થી ૩૦% વિદ્યાર્થીઓને અન્ય વિકલ્પો મળી ગયા છે, અને બાકીના વિદ્યાર્થીઓને પણ નવી તકો અપાવવા માટે સંસ્થાઓ કામ કરી રહી છે.