ભારત સરકારે માઈક્રો અને સ્મોલ એન્ટરપ્રાઈઝિસ માટે મોટો નિર્ણય લીધો છે. હવે યુરોપિયન યુનિયનના કડક નિયમોનું પાલન કરવા માટે જરૂરી સર્ટિફિકેશનનો તમામ ખર્ચ સરકાર ભોગવશે, જેથી નિકાસકારોને મોટી રાહત મળશે.
નિકાસકારો પરથી બોજ હળવો
વાણિજ્ય અને ઉદ્યોગ મંત્રી પીયૂષ ગોયલે મોટી જાહેરાત કરતા જણાવ્યું છે કે, હવે નાના નિકાસકારોએ આંતરરાષ્ટ્રીય માપદંડો પૂર્ણ કરવા માટે જે મોંઘું સર્ટિફિકેશન કરાવવું પડે છે, તેનો ખર્ચ સરકારે ઉપાડવાનો નિર્ણય લીધો છે. ખાસ કરીને યુરોપિયન યુનિયનના CBAM (Carbon Border Adjustment Mechanism) અને EUDR (EU Deforestation Regulation) જેવા નિયમો નાના બિઝનેસ માટે અવરોધ સમાન હતા.
આ યોજના વિશે જાણો
આ પહેલ 'Export Promotion Mission' હેઠળ શરૂ કરવામાં આવી છે, જેનું કુલ બજેટ ₹25,060 કરોડ છે. 'TRACE' પ્રોગ્રામ દ્વારા નાના નિકાસકારો Directorate General of Foreign Trade માં અરજી કરીને આ નાણાકીય સહાય મેળવી શકશે. આ માટે વેલિડ Importer Exporter Code અને Udyam Registration Number હોવો જરૂરી છે.
નિકાસમાં ઘટાડાની ચિંતા
નાણાકીય વર્ષ 2025-26 માં યુરોપિયન યુનિયનને થતી ભારતની નિકાસમાં 4.57% નો ઘટાડો નોંધાયો છે, જે ઘટીને USD 72.4 અબજ પર આવી ગઈ છે. ભારતની કુલ નિકાસમાં EU નો હિસ્સો આશરે 17% છે, તેથી આ નિયમનકારી મુશ્કેલીઓને દૂર કરવી સરકારની પ્રાથમિકતા છે.
રોકાણકારો માટે શું મહત્વનું?
લાંબાગાળે આ પોલિસી સપ્લાય ચેઈનને સ્થિર કરવામાં મદદ કરશે. ઘણી નાની કંપનીઓ મોટી લિસ્ટેડ નિકાસકાર કંપનીઓની સપ્લાયર હોય છે. જો આ નાની કંપનીઓ સર્ટિફિકેશનના બોજ વગર કામ કરી શકશે, તો મોટી કંપનીઓ માટે પણ સપ્લાયમાં કોઈ વિક્ષેપ નહીં આવે અને નિકાસ વોલ્યુમમાં સુધારો જોવા મળી શકે છે.