નાણામંત્રી નિર્મલા સીતારમણની અધ્યક્ષતામાં મળેલી FSDC ની બેઠકમાં આર્ટિફિશિયલ ઈન્ટેલિજન્સ (AI) ના વધતા જોખમો અને ગ્લોબલ અનિશ્ચિતતા પર ચર્ચા કરવામાં આવી છે. બેન્કો માટે નવી સાયબર સુરક્ષા વ્યૂહરચના અને વિદેશી રોકાણકારો માટે સરળ KYC પ્રક્રિયા જેવા નિર્ણયો લેવાયા છે.
નવી સાયબર સુરક્ષા વ્યૂહરચના
નવી દિલ્હીમાં મળેલી FSDC ની 30મી બેઠકનો મુખ્ય એજન્ડા બેન્કિંગ સેક્ટરને સુરક્ષિત બનાવવાનો હતો. ખાસ કરીને રિજનલ રૂરલ બેન્કોમાં સાયબર હુમલાનું જોખમ વધુ હોવાથી, સરકારે 'યુનિફાઇડ ફાઇનાન્શિયલ સેક્ટર સાયબર સિક્યોરિટી સ્ટ્રેટેજી' લોન્ચ કરી છે. હવે બેન્કોએ તેમની ટેકનોલોજી અને સુરક્ષા પાછળ વધુ ખર્ચ કરવો પડી શકે છે જેથી નવી કમ્પ્લાયન્સ ગાઈડલાઈન્સનું પાલન થઈ શકે.
લોન મેળવવાની પ્રક્રિયા થશે વધુ સરળ
સરકાર હવે 'યુનિફાઇડ લેન્ડિંગ ઇન્ટરફેસ' (ULI) અને 'એકાઉન્ટ એગ્રીગેટર' ફ્રેમવર્ક પર વધુ ભાર મૂકી રહી છે. આ પગલાનો મુખ્ય હેતુ MSMEs (સૂક્ષ્મ, લઘુ અને મધ્યમ ઉદ્યોગો) માટે લોન મેળવવાની પ્રક્રિયાને ઝડપી અને સસ્તી બનાવવાનો છે. ડિજિટલ પબ્લિક ઇન્ફ્રાસ્ટ્રક્ચર મજબૂત થવાથી લોન પ્રોસેસિંગનો ખર્ચ ઘટશે.
વિદેશી રોકાણ અને GIFT City ને પ્રોત્સાહન
વિદેશી પોર્ટફોલિયો રોકાણકારો અને NRI માટે રોકાણની પ્રક્રિયા સરળ બનાવવા માટે ડિજિટલ-ફર્સ્ટ KYC નિયમો લાવવામાં આવશે. આ સાથે જ, ગુજરાતના GIFT સિટીમાં મૂડીનો પ્રવાહ વધારવા માટે વિશેષ ચર્ચા કરવામાં આવી છે. આ નિર્ણયોનો હેતુ ભારતીય માર્કેટને ગ્લોબલ રોકાણકારો માટે વધુ આકર્ષક બનાવવાનો છે.
લાવારિસ મિલકતોની રિકવરી
છેલ્લે, સરકારે બેન્કિંગ સિસ્ટમમાં રહેલી લાવારિસ થાપણો, ડિવિડન્ડ અને ઈન્સ્યોરન્સ ફંડ્સને પરત લાવવા પર પણ ભાર મૂક્યો છે. સિસ્ટમમાં પારદર્શિતા લાવવા માટે આ એક મોટું પગલું માનવામાં આવી રહ્યું છે.