નાણામંત્રી નિર્મલા સીતારમણે ભારતીય ફેમિલી-રન કંપનીઓને પ્રોફેશનલ ગવર્નન્સ અને સક્સેસન પ્લાનિંગ પર ધ્યાન કેન્દ્રિત કરવાની સલાહ આપી છે. સાથે જ, તેમણે ભારતમાં R&D પાછળનો ખર્ચ વધારીને ઈનોવેશન પર ભાર મૂકવા અપીલ કરી છે.
નાણામંત્રી નિર્મલા સીતારમણે ઓલ ઈન્ડિયા મેનેજમેન્ટ એસોસિએશનના એક કાર્યક્રમમાં ભારતીય ફેમિલી-રન કોર્પોરેટ્સને સ્પષ્ટ સંદેશ આપ્યો છે કે, લાંબા ગાળાની સફળતા માટે માત્ર વ્યવસાયનું કદ જ કાફી નથી, પરંતુ પ્રોફેશનલ લીડરશીપ સ્ટ્રક્ચર હોવું અનિવાર્ય છે.
રોકાણકારો માટે ગવર્નન્સ કેમ જરૂરી?
રોકાણકારો માટે કંપનીની ગવર્નન્સ એ જોખમ મૂલ્યાંકનનું સૌથી મહત્વનું પાસું છે. પરિવાર-સંચાલિત વિવાદો અને અનિશ્ચિત સક્સેસન પ્લાનિંગને કારણે શેરના ભાવમાં અસ્થિરતા આવે છે. નાણામંત્રીના આ નિવેદન બાદ હવે એવા સંકેત મળે છે કે, જે કંપનીઓ પ્રોફેશનલ માળખું નહીં અપનાવે, તેના પર સરકારી અને બજારની તપાસ વધી શકે છે. શેરધારકો માટે પારદર્શક ટ્રાન્ઝિશન એ વેલ્યુ જાળવી રાખવા માટેની ચાવી છે.
R&D માં ભારત ઘણું પાછળ
નાણામંત્રીએ ભારતના ઈનોવેશન ડેફિસિટ તરફ ઈશારો કરતા જણાવ્યું કે, ભારતનો કુલ R&D ખર્ચ જીડીપી (GDP) ના માત્ર 0.83% છે. તેની સામે અમેરિકા અને ચીન જેવા દેશો 2.7% થી 3.5% સુધી ખર્ચ કરી રહ્યા છે. ખાનગી ક્ષેત્રનો તેમાં હિસ્સો માત્ર 36% છે, જેને વધારીને 'મેડ ઇન ઇન્ડિયા' થી 'ઈમેજિન ઇન ઇન્ડિયા' તરફ જવાની જરૂર છે.
રોકાણકારો માટે ચેકલિસ્ટ
શેરહોલ્ડર્સ હવે કંપનીઓના વાર્ષિક રિપોર્ટમાં આ બાબતો ખાસ તપાસે:
- સક્સેસન પ્લાનિંગ: લીડરશીપ ટ્રાન્ઝિશનની સ્પષ્ટતા.
- R&D બજેટ: કંપની પોતાના નફાનો કેટલો હિસ્સો રિસર્ચમાં વાપરે છે.
- માર્કેટ રીચ: શહેરી વિસ્તારો ઉપરાંત ગ્રામીણ અને અસંગઠિત ક્ષેત્રમાં કંપનીનું વિસ્તરણ.