ભારતીય રિટેલ બ્રાન્ડ્સ હવે આક્રમક વિસ્તરણને બદલે વધુ મજબૂત બિઝનેસ મોડલ અપનાવી રહી છે. લોકલાઈઝ્ડ સપ્લાય ચેઈન અને મિક્સ્ડ-યૂઝ રિયલ એસ્ટેટ પર ધ્યાન કેન્દ્રિત કરીને કંપનીઓ તેમના પ્રોફિટ માર્જિનને સુરક્ષિત કરવા માંગે છે.
ભારતીય રિટેલ બ્રાન્ડ્સ હાલમાં બદલાતા કોમોડિટી ભાવ અને ઊંચા પ્રોપર્ટી ખર્ચ સામે ટકી રહેવા માટે પોતાની વૃદ્ધિની રણનીતિમાં મોટા ફેરફાર કરી રહી છે. વર્ષો સુધી ઈન્ડસ્ટ્રીનું મુખ્ય ધ્યાન માત્ર નવા સ્ટોર્સ ખોલવા અને પ્રાઈમ લોકેશન પર કબજો જમાવવા પર હતું, પરંતુ હવે કંપનીઓ પ્રોફિટ પર ધ્યાન આપી રહી છે.
નફાને સુરક્ષિત કરવાની કવાયત
કોમોડિટીના ભાવમાં આવતી અનિશ્ચિતતાને કારણે ઓપરેશનલ ખર્ચ વધવાથી કંપનીઓના નેટ પ્રોફિટ પર સીધી અસર પડે છે. આ સમસ્યાને દૂર કરવા માટે, રિટેલર્સ હવે 'ડીસેન્ટ્રલાઈઝ્ડ' અભિગમ અપનાવી રહ્યા છે. જેમાં પ્રાદેશિક ટીમોને ઈન્વેન્ટરી અને પ્રાઈસિંગનું સંચાલન કરવાની સત્તા આપવામાં આવે છે, જેથી સ્થાનિક ડિમાન્ડ મુજબ ઝડપી નિર્ણયો લઈ શકાય અને વધારાની ઈન્વેન્ટરીનું જોખમ ઘટાડી શકાય.
રિયલ એસ્ટેટ વ્યૂહરચનામાં બદલાવ
હવે કંપનીઓ એવા પ્રોજેક્ટ્સ તરફ વળી રહી છે જે 'મિક્સ્ડ-યૂઝ' હોય, એટલે કે જ્યાં રહેણાંક, ઓફિસ અને મનોરંજનના સ્થળો એકસાથે હોય. આ પ્રકારના ઈકોસિસ્ટમમાં સ્ટોર્સ હોવાથી ફૂટફોલ (ગ્રાહકોની અવરજવર) વધે છે અને પ્રાઈમ લોકેશનના ઊંચા ભાડાનો ભાર ઓછો થાય છે.
રોકાણકારો માટે શું મહત્વનું?
ભૂતકાળમાં રોકાણકારો માત્ર રેવન્યુ ગ્રોથ જોતા હતા, પરંતુ હવે સ્ટોર-લેવલની કાર્યક્ષમતા અને રિટર્ન ઓન કેપિટલ જોવું અનિવાર્ય બન્યું છે. આગામી સમયમાં, જે કંપનીઓ કેપિટલ ખર્ચમાં વધારો કર્યા વિના સ્થિર વૃદ્ધિ જાળવી શકશે, તે લાંબા ગાળે શેરબજારમાં વધુ મજબૂત દેખાવ કરી શકશે.