FSSAI એ પ્રોસેસ્ડ ફૂડ આઈટમ્સ માટે નવા નિયમો રજૂ કર્યા છે. વધુ પડતી ખાંડ, મીઠું કે ફેટ ધરાવતી પ્રોડક્ટ્સ પર હવે ફરજિયાતપણે 'Red Hexagon' નું નિશાન હશે, જેની સીધી અસર FMCG સેક્ટરના શેર્સ પર પડી શકે છે.
શું છે નવો નિયમ?
ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) એ સુપ્રીમ કોર્ટમાં એક મહત્વનો પ્રસ્તાવ રજૂ કર્યો છે. હવે પેકેજ્ડ ફૂડના પેકેટ પર આગળના ભાગમાં 'Red Hexagon' (લાલ ષટ્કોણ) સિમ્બોલ લગાવવો ફરજિયાત બની શકે છે. આ નિશાન એવા ખાદ્ય પદાર્થો પર હશે જેમાં ખાંડ, મીઠું કે ફેટનું પ્રમાણ નિર્ધારિત મર્યાદા કરતા વધારે હોય.
FMCG કંપનીઓ માટે પડકાર
આ નિર્ણયથી દેશની મોટી ફૂડ અને બેવરેજ કંપનીઓ સામે નવા પડકારો ઊભા થયા છે. કંપનીઓ પાસે હવે બે રસ્તા છે: કાં તો તેઓ પોતાની પ્રોડક્ટની રેસિપીમાં ફેરફાર કરીને તેમાં ખાંડ કે મીઠું ઘટાડે, અથવા પ્રોડક્ટ પર વોર્નિંગ લેબલ સ્વીકારે. જો કંપનીઓ રેસિપી બદલવાનું નક્કી કરે તો તેમાં મોટો ખર્ચ (Capital Expenditure) અને સમય લાગી શકે છે. આ ઉપરાંત, પેકેટ પર વોર્નિંગ લેબલ હોવાથી ગ્રાહકોની માનસિકતા પર પણ અસર પડી શકે છે, જે સીધી રીતે સેલ્સને અસર કરી શકે છે.
કયા પ્રોડક્ટ્સને મળશે રાહત?
FSSAI એ સ્પષ્ટતા કરી છે કે ઘી, ખાદ્ય તેલ, મધ અને સિંગલ-ઇન્ગ્રીડિયન્ટ પ્રોડક્ટ્સને આ લેબલિંગ નિયમોમાંથી બાકાત રાખવામાં આવશે. આ નિયમ ખાસ કરીને પ્રોસેસ્ડ એડિટિવ્સ ધરાવતી વસ્તુઓ માટે જ બનાવવામાં આવ્યો છે.
આગામી સમય અને અમલીકરણ
આ નિયમ ICMR અને નેશનલ ઈન્સ્ટિટ્યૂટ ઓફ ન્યુટ્રીશનની 2024 ની ગાઈડલાઈન્સ મુજબ છે. કંપનીઓને આમાં એડજસ્ટ થવા માટે 1 વર્ષનો સ્વૈચ્છિક ગાળો આપવાનું સૂચન કરવામાં આવ્યું છે, જેથી પેકેજિંગ સ્ટોક અને સપ્લાય ચેઈનને મેનેજ કરી શકાય. હાલમાં સુપ્રીમ કોર્ટે આ મામલે પોતાનો નિર્ણય અનામત રાખ્યો છે. રોકાણકારોએ હવે કંપનીઓના પ્રોડક્ટ પોર્ટફોલિયોમાં થતા ફેરફારો પર ખાસ નજર રાખવી જોઈએ.