FSSAI એ તમામ ન્યુટ્રાસ્યુટિકલ મેન્યુફેક્ચરર્સ માટે કડક નિર્દેશો જાહેર કર્યા છે. હવે બોટનિકલ એક્સટ્રેક્ટ ધરાવતા પ્રોડક્ટ્સ પર ફરજિયાતપણે ચેતવણી (Warning Label) મૂકવી પડશે. નિયમોનું પાલન ન કરનારી કંપનીઓના લાયસન્સ રદ થઈ શકે છે.
નવો નિયમ અને તેની અસર
ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઇન્ડિયા (FSSAI) એ હેલ્થ સપ્લિમેન્ટ અને ન્યુટ્રાસ્યુટિકલ સેક્ટર પર સકંજો કસ્યો છે. નવી ગાઈડલાઈન મુજબ, હવે જે પ્રોડક્ટમાં પ્લાન્ટ-બેઝ્ડ કે બોટનિકલ એક્સટ્રેક્ટનો ઉપયોગ થયો હોય, તેના પર સ્પષ્ટ ચેતવણી લખવી અનિવાર્ય છે.
મેન્યુફેક્ચરિંગ સેક્ટર માટે શું છે ચેતવણી?
કંપનીઓએ હવે દરેક પ્રોડક્ટના ઘટકો પ્રમાણે ડિસ્ક્લેમર આપવા પડશે. ઉદાહરણ તરીકે, જે પ્રોડક્ટમાં લીમડા જેવા અર્કનો ઉપયોગ થયો હોય, તેમાં નાના બાળકો માટે ચેતવણી લખવી પડશે. તેવી જ રીતે, પપૈયાના પાનનો રસ હોય તો ગર્ભવતી મહિલાઓ માટે સલાહ દર્શાવવી જરૂરી છે. આ નિયમો 2016 ના ફૂડ સેફ્ટી એન્ડ સ્ટાન્ડર્ડ્સ રેગ્યુલેશન્સ હેઠળ લાવવામાં આવ્યા છે.
આ આદેશથી કંપનીઓના ઓપરેશનલ ખર્ચમાં વધારો થવાની શક્યતા છે. પેકેજિંગમાં ફેરફાર અને જૂના સ્ટોકનું મેનેજમેન્ટ કરવાથી કંપનીઓના શોર્ટ-ટર્મ પ્રોફિટ માર્જિન પર દબાણ આવી શકે છે. વધુમાં, FSSAI એ સ્પષ્ટ કર્યું છે કે કોઈપણ કંપની તેમના પ્રોડક્ટ્સને કોઈ રોગ મટાડવાની દવા તરીકે પ્રોજેક્ટ કરી શકશે નહીં.
રોકાણકારો માટે એલર્ટ
સૌથી મોટું જોખમ લાયસન્સ સસ્પેન્શનનું છે. 2006 ના ફૂડ સેફ્ટી એન્ડ સ્ટાન્ડર્ડ્સ એક્ટ હેઠળ, લેબલિંગમાં ચૂક કરનાર કંપનીઓને ભારે દંડ અથવા બિઝનેસ લાયસન્સ ગુમાવવાનો વારો આવી શકે છે. જે કંપનીઓ ન્યુટ્રાસ્યુટિકલ પોર્ટફોલિયો ધરાવે છે, તેમના શેરધારકોએ કંપની કેટલી ઝડપથી નવા નિયમો સાથે અનુકૂલન સાધે છે તેના પર નજર રાખવી જરૂરી છે. હવે માર્કેટિંગમાં મનઘડત દાવા કરવાનો દોર પૂરો થયો છે, જે કંપનીઓ આ બદલાવને ઝડપથી સ્વીકારશે, તે જ માર્કેટમાં ટકી શકશે.