ભારતની એનર્જી સોર્સિંગ રણનીતિમાં મોટો બદલાવ આવ્યો છે. ઓગસ્ટ મહિનામાં વેનેઝુએલા ભારત માટે ત્રીજું સૌથી મોટું ક્રૂડ ઓઈલ સપ્લાયર બની ગયું છે, જેણે સાઉદી અરેબિયાને ચોથા ક્રમે ધકેલી દીધું છે. આ ફેરફારથી ONGC અને ભારતીય રિફાઇનરી કંપનીઓ માટે નવી તકો ખુલી છે.
ભારતની ક્રૂડ ઓઈલ આયાતની વ્યૂહરચનામાં મોટો ફેરફાર જોવા મળ્યો છે. ઓગસ્ટ 2026 સુધીના આંકડા મુજબ, વેનેઝુએલા હવે ભારતનું ત્રીજું સૌથી મોટું ક્રૂડ ઓઈલ સપ્લાયર બની ગયું છે. રિપોર્ટ અનુસાર, વેનેઝુએલાથી ભારતની આયાત વધીને 358,000 બેરલ પ્રતિ દિવસ થઈ ગઈ છે, જ્યારે સાઉદી અરેબિયા 339,000 બેરલ પ્રતિ દિવસ સાથે ચોથા ક્રમે સરકી ગયું છે.
ભારતીય રિફાઇનરીઓ માટે શું છે તક?
Reliance Industries જેવી મોટી રિફાઇનરીઓ માટે આ ફેરફાર મહત્વનો છે. વેનેઝુએલાનું ક્રૂડ સામાન્ય રીતે મધ્ય પૂર્વના ક્રૂડ કરતા 'હેવી' હોય છે અને તેમાં સલ્ફરનું પ્રમાણ વધુ હોય છે. જે રિફાઇનરીઓ આ પ્રકારનું હેવી ક્રૂડ પ્રોસેસ કરવાની ક્ષમતા ધરાવે છે, તેમને આ સસ્તું પડે છે, જેનાથી કંપનીના પ્રોફિટ માર્જિન પર પોઝિટિવ અસર પડી શકે છે.
ONGC માટે મોટી રાહત
આ સમગ્ર ઘટનાક્રમમાં સરકારી કંપની ONGC માટે સારા સમાચાર છે. કંપનીને અમેરિકાના ટ્રેઝરી વિભાગના OFAC તરફથી વેનેઝુએલામાં કામકાજ ફરી શરૂ કરવા માટે મંજૂરી મળી ગઈ છે. આ મંજૂરી બાદ કંપની પોતાની અસ્કયામતો (Assets) મેનેજ કરી શકશે અને ત્યાં ફસાયેલા ડિવિડન્ડની રકમ પાછી મેળવવાની દિશામાં આગળ વધી શકશે.
માર્કેટ માટે જોખમ શું છે?
જોકે, આમાં જોખમ પણ રહેલું છે. વેનેઝુએલાનું ઓઈલ ઇન્ફ્રાસ્ટ્રક્ચર વર્ષોથી નબળું છે, જેના કારણે સપ્લાયમાં અસ્થિરતા આવી શકે છે. ઉપરાંત, જો અમેરિકાની નીતિ કે પ્રતિબંધોમાં કોઈ ફેરફાર થાય, તો ભારતીય કંપનીઓ માટે લોજિસ્ટિકલ પડકારો વધી શકે છે. હાલમાં રશિયા હજુ પણ ભારતનું ટોચનું ક્રૂડ સપ્લાયર છે, પરંતુ રશિયન સપ્લાયમાં 27% નો ઘટાડો જોવા મળ્યો છે.