Brent Crude $111 ને પાર: સાઉદીમાં તણાવ વધતા ભારતીય શેરબજાર પર શું થશે અસર?

ગ્લોબલ ઓઈલ માર્કેટમાં ભારે વોલેટિલિટી જોવા મળી રહી છે. ગુરુવારે Brent crude ના ભાવ $111 પ્રતિ બેરલની સપાટીએ પહોંચ્યા છે. સાઉદી અરેબિયામાં વધેલા તણાવ અને ત્યારબાદ અમેરિકી અધિકારીઓ દ્વારા એમ્બેસી સ્ટાફને ખસેડવાના આદેશોને પગલે રોકાણકારોમાં ફફડાટ છે. પશ્ચિમ એશિયાના મુખ્ય ટ્રાન્ઝિટ રૂટ્સ પર જોખમ તોળાઈ રહ્યું હોવાથી એનર્જીના ભાવ ઊંચા જળવાઈ રહેવાની શક્યતા છે.

ભારતીય અર્થતંત્ર પર શું અસર પડશે?

ભારત તેની ક્રૂડ ઓઈલની કુલ જરૂરિયાતના 85% થી વધુ આયાત કરે છે. જ્યારે ક્રૂડના ભાવ આ રીતે ભડકે બળે છે, ત્યારે ભારતનું આયાત બિલ સીધું વધી જાય છે. આનાથી કરંટ એકાઉન્ટ ડેફિસિટ પર દબાણ આવે છે અને રૂપિયો નબળો પડી શકે છે. રૂપિયો નબળો પડવાથી આયાતી મોંઘવારી (Imported Inflation) વધે છે, જે RBI માટે વ્યાજ દર નક્કી કરવામાં મુશ્કેલી ઊભી કરે છે.

કયા સેક્ટર પર રહેશે સૌથી વધુ દબાણ?

• OMCs (Oil Marketing Companies): HPCL, BPCL, અને IOCL જેવી કંપનીઓ માટે આ સ્થિતિ કપરી છે. જો સરકાર પેટ્રોલ-ડીઝલના ભાવ વધારવાની મંજૂરી ન આપે, તો આ કંપનીઓના માર્કેટિંગ માર્જિન ઘટશે અને પ્રોફિટ પર અસર પડશે.
• Upstream Companies: ONGC જેવી કંપનીઓને પ્રતિ બેરલ વધુ આવક મળી શકે છે, પરંતુ રોકાણકારો સરકાર દ્વારા લાદવામાં આવતા 'વિન્ડફોલ ટેક્સ' પર બાજ નજર રાખી રહ્યા છે.
• Aviation & Paints: InterGlobe Aviation (IndiGo) જેવી એરલાઈન્સ માટે ATF (Aviation Turbine Fuel) ના ભાવ વધતા ખર્ચ વધી જશે. તેવી જ રીતે, પેઈન્ટ અને ટાયર કંપનીઓ પર પણ કાચા માલના ખર્ચના કારણે માર્જિનનું દબાણ જોવા મળી શકે છે.