Black Pepper: દિવાળીની ડિમાન્ડને કારણે કાળા મરીના ભાવમાં તોફાની વધારો, પ્રતિ કિલો ₹16 નો ઉછાળો

માર્કેટમાં તેજીનું કારણ

ઘરઆંગણે કાળા મરીના ભાવમાં છેલ્લા ત્રણ સપ્તાહમાં ₹16 પ્રતિ કિલોનો વધારો નોંધાયો છે. આ તેજી પાછળનું મુખ્ય કારણ દિવાળીનો તહેવાર છે. તહેવારોને કારણે ટ્રેડર્સ અને પ્રોસેસર્સ તરફથી માંગમાં મોટો ઉછાળો આવ્યો છે, જેઓ તેમના ફોરવર્ડ કોન્ટ્રાક્ટ્સ પૂરા કરવા માટે દોડધામ કરી રહ્યા છે. હાલમાં કોચી માર્કેટમાં અનગાર્બલ્ડ મરી ₹720 અને ગાર્બલ્ડ મરી ₹740 પ્રતિ કિલોના ભાવે ટ્રેડ થઈ રહ્યા છે.

સપ્લાય અને વેપારીઓની વ્યૂહરચના

સ્થાનિક વેપારીઓ હજુ વધુ ભાવ વધવાની આશાએ સ્ટોક રોકી રહ્યા છે, જેના કારણે માર્કેટમાં સપ્લાય મર્યાદિત છે. ટર્મિનલ માર્કેટમાં 36 ટનની આવક થઈ હોવા છતાં, ડિલિવરી પૂરી કરવા માટે વેપારીઓની સક્રિય ખરીદીએ ભાવને ટેકો આપ્યો છે.

ઇન્ટરનેશનલ માર્કેટનું જોખમ

ભારતીય મરીના ભાવ હાલમાં આશરે $7,825 પ્રતિ ટનની આસપાસ છે, જે વૈશ્વિક માર્કેટ કરતા ઘણા ઊંચા છે. આ મોટો તફાવત ઇમ્પોર્ટ માટે મોકળું મેદાન આપે છે. હાલમાં શ્રીલંકાથી મરીની આયાત કરીને સપ્લાય ગેપ ભરવામાં આવી રહ્યો છે.

આગામી સમયમાં બ્રાઝિલ અને ઇન્ડોનેશિયા જેવા દેશોમાં નવી સીઝનનું હાર્વેસ્ટિંગ શરૂ થવાનું છે. બ્રાઝિલમાં મરી $6,000 પ્રતિ ટન કરતા પણ ઓછા ભાવે મળી રહ્યા છે, જ્યારે વિયેતનામ અને ઇન્ડોનેશિયામાં ભાવ અનુક્રમે $6,000 અને $6,500 ની આસપાસ છે. તહેવારોની માંગ ઘટ્યા બાદ જો આયાત વધશે, તો સ્થાનિક ભાવમાં ઘટાડો જોવા મળી શકે છે.