માર્કેટના ટોપ એક્સપર્ટ્સ રાજીવ ઠક્કર, પ્રશાંત જૈન અને લક્ષ્મી ઐયરે સ્મોલ-કેપ ટ્રેન્ડ પાછળ આંધળુકિયા ન કરવા ચેતવણી આપી છે. તેમણે કહ્યું કે શેરના લેબલ કરતા કંપનીની વાસ્તવિક કમાણી અને કેશ ફ્લો વધુ મહત્વના છે.
તાજેતરમાં આયોજિત બિઝનેસ સ્ટાન્ડર્ડ BFSI ઇનસાઇટ સમિટમાં દિગ્ગજ ફંડ મેનેજરોએ વર્તમાન માર્કેટના વલણ અંગે ગંભીર ચિંતા વ્યક્ત કરી હતી. તેમણે જણાવ્યું હતું કે રોકાણકારો ઘણીવાર કંપની ગ્રોથ સ્ટોક છે કે વેલ્યુ સ્ટોક, તેવા લેબલ પાછળ દોડે છે, જ્યારે ખરેખર તો કંપનીની બિઝનેસ તાકાત જોવી જરૂરી છે. માર્કેટની અસ્થિરતા સામે ટકી રહેવા માટે શેરના ભાવ અને તેની આંતરિક કિંમત (Intrinsic Value) વચ્ચેનો તફાવત સમજવો અનિવાર્ય છે.
ઐતિહાસિક વેલ્યુએશનનો પાઠ
નિષ્ણાતોએ ચેતવણી આપી કે મજબૂત પ્રોફિટ ગ્રોથ ધરાવતી કંપની પણ ખોટું રોકાણ સાબિત થઈ શકે છે જો તમારી ખરીદ કિંમત ખૂબ ઊંચી હોય. દાખલા તરીકે, 2000 થી 2008 દરમિયાન Infosys નો નફો 7 ગણો વધ્યો હતો, પરંતુ શેરના ભાવ ખાસ વધ્યા નહોતા કારણ કે રોકાણકારોએ શરૂઆતમાં જ ખૂબ મોંઘા ભાવે શેર ખરીદ્યા હતા.
લાર્જ-કેપની સ્થિરતા વિરુદ્ધ સ્મોલ-કેપ ક્રેઝ
હાલમાં રોકાણકારો લાર્જ-કેપમાંથી નાણાં કાઢીને સ્મોલ અને મિડ-કેપમાં ઠાલવી રહ્યા છે. આ વલણ પર સવાલ ઉઠાવતા નિષ્ણાતોએ કહ્યું કે ટોપ 100 કંપનીઓ ભારતની ટોપ 500 લિસ્ટેડ કંપનીઓના કુલ નફાના 65 ટકા થી વધુ હિસ્સો ધરાવે છે. લાર્જ-કેપ કંપનીઓ જેવી સ્થિરતા અને કેશ ફ્લો સ્મોલ-કેપમાં મળવા મુશ્કેલ છે. સ્મોલ-કેપમાં રોકાણ કરતા પહેલા કંપનીના ફંડામેન્ટલ્સનો ઊંડો અભ્યાસ કરવો જરૂરી છે.
AI અને ટેક હાઈપથી સાવધાન
AI (આર્ટિફિશિયલ ઇન્ટેલિજન્સ) ના નામે ચાલી રહેલી તેજી અંગે પણ એક્સપર્ટ્સે સાવધાન કર્યા છે. તેમણે યુએસ ટેક સેક્ટર અને ભારતીય ટેક સેક્ટર વચ્ચેનો તફાવત સ્પષ્ટ કરતા કહ્યું કે, માત્ર AI કંપની હોવા માત્રથી નફો થશે તેવું માની લેવું ભૂલભરેલું છે. રોકાણકારોએ એવી કંપનીઓ શોધવી જોઈએ જ્યાં પોઝિટિવ કેશ ફ્લોનો સ્પષ્ટ રસ્તો દેખાતો હોય.