Bank of America એ ગ્રાહકોને સ્પષ્ટ સૂચના આપી છે કે તેઓ AI આસિસ્ટન્ટ સાથે પોતાનો લોગિન ડેટા શેર ન કરે. આમ કરવાથી માત્ર ડેટા લીક થવાનું જોખમ જ નથી, પરંતુ થનારા વ્યવહારની જવાબદારી પણ ગ્રાહકની જ રહેશે.
સુરક્ષા માટે લેવાયેલું કડક પગલું
આજકાલ બજેટિંગ કે ઓટોમેટેડ શોપિંગ માટે AI-આધારિત ટૂલ્સનો ઉપયોગ વધ્યો છે. જોકે, Bank of America એ ગ્રાહકોને સાવચેત કરતા જણાવ્યું છે કે આવી થર્ડ-પાર્ટી એપ્સ સાથે યુઝરનેમ કે પાસવર્ડ શેર કરવાથી એકાઉન્ટ હેક થવાનું જોખમ અનેકગણું વધી જાય છે. જો કોઈ AI પ્લેટફોર્મ પર ડેટા બ્રીચ થાય, તો ગ્રાહકની તમામ નાણાકીય વિગતો જોખમમાં આવી શકે છે.
આર્થિક જવાબદારીનું જોખમ
બેંકની સૌથી મોટી ચેતવણી ગ્રાહકોની જવાબદારી (Liability) વિશે છે. જો તમે તમારી મંજૂરીથી AI એજન્ટને લોગિન વિગતો આપી હોય, તો તેના દ્વારા કરવામાં આવતા તમામ ટ્રાન્ઝેક્શન 'ઓથોરાઈઝ્ડ' માનવામાં આવશે. જો AI ભૂલથી કોઈ ખોટો વ્યવહાર કરે છે, તો બેંક તેને ફ્રોડ નહીં ગણે અને નુકસાનની સંપૂર્ણ જવાબદારી ગ્રાહકની રહેશે.
બેંકિંગ સિસ્ટમ અને સલામતી
ઘણીવાર AI ટૂલ દ્વારા થતા લોગિનને બેંકની સુરક્ષા સિસ્ટમ 'ફ્રોડ' તરીકે ઓળખી કાઢે છે, જેના કારણે ગ્રાહકનું ખાતું બ્લોક પણ થઈ શકે છે. ભારતની વાત કરીએ તો, Reserve Bank of India (RBI) પણ ડિજિટલ ક્રેડેન્શિયલની સુરક્ષા માટે ખૂબ કડક નિયમો ધરાવે છે. કોઈપણ થર્ડ-પાર્ટી ઇન્ટરફેસનો ઉપયોગ કરવો એ સુરક્ષા અને પાલન (Compliance) બંને દ્રષ્ટિએ જોખમી સાબિત થઈ શકે છે.