સોમવારથી પબ્લિક સેક્ટર, જૂની ખાનગી બેંકો અને રિજનલ રૂરલ બેંકોમાં **3** દિવસની હડતાલનું એલાન આપવામાં આવ્યું છે. જેના કારણે ચેક ક્લિયરન્સ અને કેશ ડિપોઝિટ જેવી સેવાઓ ખોરવાઈ શકે છે.
ભારતમાં બેંકિંગ સેવાઓ પર ગંભીર અસર થવાની શક્યતા છે, કારણ કે 'યુનાઈટેડ ફોરમ ઓફ બેંક યુનિયન્સ' દ્વારા સોમવારથી 3 દિવસની દેશવ્યાપી હડતાલનું એલાન આપવામાં આવ્યું છે. આ હડતાલમાં જાહેર ક્ષેત્રની બેંકો, જૂની પેઢીની ખાનગી બેંકો અને ગ્રામીણ બેંકો સામેલ છે. પરિણામે ગ્રાહકો માટે કેશ ડિપોઝિટ, ચેક પ્રોસેસિંગ અને બેંક શાખાની રૂબરૂ મુલાકાત જેવી સેવાઓ બંધ રહેશે.
પ્રાઈવેટ બેંકો પર શું અસર?
રાહતની વાત એ છે કે, નવી પેઢીની ખાનગી બેંકો જેવી કે HDFC Bank, ICICI Bank અને Axis Bank આ હડતાલનો હિસ્સો નથી, જેથી ત્યાં કામકાજ સામાન્ય રહેશે. સ્ટેટ બેંક ઓફ ઈન્ડિયા (SBI) એ પણ ગ્રાહકોને મોબાઈલ એપ, UPI અને ઈન્ટરનેટ બેંકિંગનો ઉપયોગ કરવાની સલાહ આપી છે.
કેમ છે હડતાલ?
બેંક કર્મચારીઓની મુખ્ય માંગણીઓ લાંબા સમયથી પડતર છે, જેમાં અઠવાડિયામાં 5 દિવસ કામકાજ, પેન્શનમાં સુધારા, અને 'નેશનલ પેન્શન સિસ્ટમ'માંથી ફરી 'ઓલ્ડ પેન્શન સ્કીમ'માં જવાની માંગ સામેલ છે. નાણા મંત્રાલય અને યુનિયન વચ્ચેની વાટાઘાટો હાલમાં નિષ્ફળ રહી છે.
રોકાણકારો માટે ચેતવણી
જો સરકાર અને યુનિયન વચ્ચે કોઈ સમાધાન નહીં આવે, તો યુનિયન્સે 26 ઓક્ટોબરથી અનિશ્ચિત મુદ્દતની હડતાલની ચીમકી ઉચ્ચારી છે. જો આ વિવાદ લાંબો ખેંચાશે, તો બેંકિંગ સેક્ટરમાં વ્યવહારની ગતિ અને ગ્રાહકોના સેન્ટિમેન્ટ પર નકારાત્મક અસર પડી શકે છે.