ટાયર બનાવતી દિગ્ગજ કંપની Michelin હવે ભારતને પોતાના ગ્લોબલ મેન્યુફેક્ચરિંગ નેટવર્ક માટે મુખ્ય સોર્સિંગ હબ બનાવવા જઈ રહી છે. કંપની રબર અને કાર્બન બ્લેક જેવા કાચા માલ માટે ભારત પર નિર્ભરતા વધારશે.
ફ્રેન્ચ ટાયર ઉત્પાદક Michelin હવે પોતાની સપ્લાય ચેઈન વ્યૂહરચનામાં મોટો ફેરફાર કરી રહ્યું છે. કંપની હવે નેચરલ રબર, કાર્બન બ્લેક, સ્ટીલ અને પેટ્રોકેમિકલ્સ જેવા કાચા માલના સોર્સિંગ માટે ભારતને કેન્દ્રમાં રાખી રહી છે. આ માત્ર ભારતીય બજાર પૂરતું મર્યાદિત નથી, પરંતુ ભારતને વૈશ્વિક સ્તરે ઉત્પાદન માટે સપ્લાય બેઝ તરીકે વિકસાવવાનો કંપનીનો પ્લાન છે.
AIM ક્લસ્ટર પર કંપનીની નજર
Michelin માટે આફ્રિકા, ઈન્ડિયા અને મિડલ ઈસ્ટ (AIM) ક્લસ્ટર ભવિષ્યના વિકાસ માટે સૌથી મહત્વનું ક્ષેત્ર છે. જ્યાં અમેરિકા, યુરોપ અને જાપાન જેવા વિકસિત બજારોમાં માંગ સ્થિર છે, ત્યાં આ ક્ષેત્રમાં કંપની ડબલ ડિજિટ ગ્રોથની અપેક્ષા રાખી રહી છે. ભારતને મજબૂત બનાવવા માટે કંપની સ્થાનિક સ્ટાર્ટઅપ્સ સાથે પણ જોડાણ કરી રહી છે.
ચેન્નાઈ પ્લાન્ટની સ્થિતિ
કંપનીનો ચેન્નાઈ સ્થિત પ્લાન્ટ આ રણનીતિનું મુખ્ય કેન્દ્ર છે. આ પ્લાન્ટની વાર્ષિક ઉત્પાદન ક્ષમતા 54,000 ટન છે. અત્યારે આ પ્લાન્ટમાંથી થતા કુલ ઉત્પાદનમાંથી 30% થી 40% હિસ્સો એક્સપોર્ટ કરવામાં આવે છે. મહત્વની વાત એ છે કે, પ્લાન્ટ હાલમાં તેની સંપૂર્ણ ક્ષમતા પર કામ નથી કરી રહ્યો, એટલે કે વધારાના મોટા રોકાણ વગર પણ ઉત્પાદન વધારી શકાય તેમ છે.
માર્જિન પર દબાણ અને જોખમો
ગ્લોબલ કોમોડિટીના ભાવમાં અસ્થિરતા અને પશ્ચિમ એશિયામાં તણાવને કારણે કંપનીના પ્રોફિટ માર્જિન પર દબાણ જોવા મળી રહ્યું છે. રબર અને ક્રૂડ ઓઈલ ડેરિવેટિવ્સના વધતા ભાવને પહોંચી વળવા માટે કંપનીએ છેલ્લા છ મહિનામાં ભાવમાં અનેકવાર વધારો કર્યો છે. હવે ભારતમાંથી કાચા માલનું સોર્સિંગ કંપનીને લાંબા ગાળે ખર્ચ ઘટાડવામાં અને સપ્લાય ચેઈન પર વધુ સારું નિયંત્રણ મેળવવામાં મદદરૂપ થઈ શકે છે.