નવી દિલ્હીમાં યોજાયેલી 'EVolve Conclave'માં નીતિ-નિર્ધારકો અને ઈન્ડસ્ટ્રીના દિગ્ગજો એકત્ર થયા હતા. જેમાં ઇલેક્ટ્રિક વ્હીકલ (EV) સેક્ટરના ઝડપી વિકાસ માટે ચાર્જિંગ ઇન્ફ્રાસ્ટ્રક્ચર, ગ્રીન ફાઈનાન્સ અને સ્થાનિક મેન્યુફેક્ચરિંગને વધુ મજબૂત બનાવવાની જરૂરિયાત પર ખાસ ભાર મૂકવામાં આવ્યો છે.
નવી દિલ્હીમાં તાજેતરમાં આયોજિત 'EVolve Conclave'માં સરકારનો અભિગમ હવે માત્ર વેચાણના આંકડાથી આગળ વધીને સેક્ટરના લાંબા ગાળાના સ્વાસ્થ્ય પર કેન્દ્રિત થયો છે. નિષ્ણાતોના મતે, ભારતમાં EV અપનાવવા માટે માત્ર ગાડીઓ રસ્તા પર ઉતારવી પૂરતી નથી, પરંતુ એક મજબૂત અને સુલભ ઈકોસિસ્ટમ તૈયાર કરવી અનિવાર્ય છે.
ઈન્ફ્રાસ્ટ્રક્ચર અને ફાઈનાન્સનો સપોર્ટ
કોન્ક્લેવમાં ચાર્જિંગ સ્ટેશનની અછત અને સંસ્થાકીય ધિરાણ (Institutional Financing) વિશે ગંભીર ચર્ચા થઈ હતી. ઈન્ડસ્ટ્રીના નેતાઓનું કહેવું છે કે, જ્યાં સુધી પેટ્રોલ પંપ જેવી વિશ્વસનીય ચાર્જિંગ નેટવર્ક નહીં મળે, ત્યાં સુધી વેચાણમાં મોટો ઉછાળો લાવવો મુશ્કેલ છે. ગ્રીન ફાઈનાન્સ દ્વારા કંપનીઓ અને સ્ટાર્ટઅપ્સ માટે મૂડી ખર્ચ (Cost of Capital) ઘટાડવાનો પ્રયાસ કરવામાં આવી રહ્યો છે. રોકાણકારો માટે આ એક મહત્વનો મુદ્દો છે, કારણ કે જે કંપનીઓ પ્રાઈવેટ ચાર્જિંગ નેટવર્કમાં રોકાણ કરી રહી છે, તેમનો પ્રારંભિક ખર્ચ વધી શકે છે.
ટેકનોલોજી અને 'મેક ઇન ઇન્ડિયા'
NITI Aayog એ 'ટેકનોલોજીકલ સોવરિનિટી' પર ભાર મૂકતા સ્થાનિક R&D અને બેટરી મેન્યુફેક્ચરિંગ માટે રોડમેપ જાહેર કર્યો છે. PLI સ્કીમ્સ દ્વારા સ્થાનિક મૂલ્યવર્ધનને પ્રોત્સાહન આપવામાં આવી રહ્યું છે. રોકાણકારોએ એ જોવું જોઈએ કે કઈ કંપનીઓ સપ્લાય ચેઈનને લોકલાઈઝ કરી શકે છે, જેથી વૈશ્વિક સપ્લાય શોક્સ અને કોમોડિટીના ભાવમાં આવતા ઉતાર-ચઢાવ સામે પ્રોફિટ માર્જિન સુરક્ષિત રહી શકે.
પડકારો અને બજારની વાસ્તવિકતા
જોકે, બેટરી પ્રોડક્શન માટે જરૂરી ક્રિટિકલ મિનરલ્સ માટે ભારતની આયાત પર નિર્ભરતા એક મોટું જોખમ છે. આ ઉપરાંત, ચાર્જિંગ ઇન્ફ્રાસ્ટ્રક્ચરના ઝડપી વિસ્તરણ માટે કેન્દ્ર, રાજ્ય સરકારો અને પાવર ડિસ્ટ્રિબ્યુશન કંપનીઓ વચ્ચે સંકલન સાધવું એક મોટો પડકાર છે. જો આ અમલીકરણમાં વિલંબ થશે, તો EV કંપનીઓના રેવન્યુ ફોરકાસ્ટ પર તેની અસર પડી શકે છે. હાલમાં જે કંપનીઓ નવા ટેકનોલોજીકલ રોકાણો અને શિસ્તબદ્ધ મૂડી ફાળવણી (Capital Allocation) વચ્ચે સંતુલન જાળવશે, તેઓ જ આ સ્પર્ધાત્મક માર્કેટમાં ટકી શકશે.