ભારત સરકાર ૧ એપ્રિલ, ૨૦૨૭ થી CAFE-3 નોર્મ્સ લાગુ કરવા જઈ રહી છે. આ નવા નિયમો અંતર્ગત ઓટો કંપનીઓએ ફ્યુઅલ ઇકોનોમીના કડક ટાર્ગેટ પૂરા કરવા પડશે, અન્યથા કંપનીઓએ મોટો દંડ ભરવો પડી શકે છે.
૧ એપ્રિલ, ૨૦૨૭ થી ભારત સરકાર Corporate Average Fuel Economy (CAFE-3) ના ત્રીજા તબક્કાનો અમલ શરૂ કરશે. આ નિયમનો મુખ્ય ઉદ્દેશ્ય ઓટો ઇન્ડસ્ટ્રીમાં ઈંધણનો વપરાશ ઘટાડવાનો અને ઇલેક્ટ્રિક વાહનો (EV) ના વેચાણને વેગ આપવાનો છે. નવા નિયમો મુજબ, કંપનીઓએ તેમની વાહનોની કુલ ફ્લીટના વજનના આધારે નક્કી કરેલા ફ્યુઅલ ટાર્ગેટમાં રહેવું પડશે.
સુપર ક્રેડિટ સિસ્ટમનો ફાયદો
ટ્રાન્ઝિશનને સરળ બનાવવા માટે સરકારે 'સુપર ક્રેડિટ' સિસ્ટમ રજૂ કરી છે. જેમાં બેટરી ઈલેક્ટ્રિક વાહનોને ત્રણ ગણી, જ્યારે સ્ટ્રોંગ હાઈબ્રિડ અને ફ્લેક્સ-ફ્યુઅલ વાહનોને ૨.૫ ગણી વેઈટેજ મળશે. આ ક્રેડિટ્સ કંપનીઓને તેમના પરંપરાગત પેટ્રોલ-ડીઝલ વાહનોના વધુ વપરાશને સરભર કરવામાં મદદ કરશે.
રોકાણકારો માટે શું છે જોખમ?
આ નિયમોનું પાલન ન કરનાર કંપનીઓએ કાં તો અન્ય કંપનીઓ પાસેથી ક્રેડિટ ખરીદવી પડશે અથવા Bureau of Energy Efficiency ને દંડ ભરવો પડશે. આ દંડની રકમ ₹૨,૫૦૦ પ્રતિ ગ્રામ CO2/km થી શરૂ થશે, જે FY32 સુધીમાં વધીને ₹૪,૫૦૦ પ્રતિ ગ્રામ થઈ જશે. જે કંપનીઓનો પોર્ટફોલિયો માત્ર પરંપરાગત એન્જિન પર નિર્ભર છે, તેમના પ્રોફિટ માર્જિન પર આ દંડની સીધી અસર પડી શકે છે.
આગામી દિવસોમાં જે કંપનીઓ ઝડપથી EV અને હાઈબ્રિડ ટેકનોલોજી તરફ વળશે, તેઓ આ નિયમોનો સામનો વધુ સારી રીતે કરી શકશે. રોકાણકારોએ હવે કંપનીઓના પ્રોડક્ટ રોડમેપ અને કેપિટલ એક્સપેન્ડિચર પ્લાન્સ પર ખાસ નજર રાખવી પડશે.