ભારતીય વાયુસેના (IAF) એ મોટી સિદ્ધિ મેળવતા Swadeshi Empresa Pvt Ltd દ્વારા તૈયાર કરાયેલા **80** સ્વદેશી ફાયરફાઈટિંગ રોબોટ્સને સેનામાં સામેલ કર્યા છે. આ રોબોટ્સ પંજાબ, રાજસ્થાન અને ગુજરાતના મહત્વના એરબેઝ પર તૈનાત કરવામાં આવ્યા છે.
ભારતીય વાયુસેનાએ પોતાની સંવેદનશીલ જગ્યાઓ અને દારૂગોળાના ડેપોની સુરક્ષા વધુ મજબૂત કરવા માટે આધુનિક ટેકનોલોજીનો સહારો લીધો છે. Swadeshi Empresa Pvt Ltd દ્વારા નિર્મિત આ રોબોટ્સ અત્યંત કપરી સ્થિતિમાં કામ કરવા માટે તૈયાર કરવામાં આવ્યા છે.
આ રોબોટ્સની ખાસિયત શું છે?
અગાઉ આવી ખાસ ટેકનોલોજી માટે વિદેશી આયાત પર નિર્ભર રહેવું પડતું હતું, પરંતુ હવે 'મેક ઇન ઇન્ડિયા' હેઠળ તેને સ્થાનિક સ્તરે તૈયાર કરવામાં આવ્યા છે. આ મશીનો 6-વ્હીલ ઈન્ડિપેન્ડન્ટ મોટર ડ્રાઈવન આર્કિટેક્ચર પર કામ કરે છે. તેમાં લાગેલા થર્મલ સેન્સર આગના સ્ત્રોતને તરત શોધી કાઢે છે, જેથી જવાનોને જોખમમાં મૂક્યા વિના આગ પર કાબૂ મેળવી શકાય છે. આ રોબોટ્સ 'વાયુ શક્તિ 2026' એક્સરસાઇઝ દરમિયાન ફિલ્ડ ટ્રાયલ્સમાં પણ સફળ રહ્યા છે.
ડિફેન્સ સેક્ટર માટે કેમ મહત્વનું?
આ આખો પ્રોજેક્ટ સરકારના iDEX (Innovations for Defence Excellence) પ્રોગ્રામ હેઠળ પૂર્ણ કરવામાં આવ્યો છે. આ પ્રોજેક્ટ 11 મહિનાના ટૂંકા ગાળામાં પૂર્ણ કરીને નાની સ્ટાર્ટઅપ કંપનીઓએ સાબિત કર્યું છે કે તેઓ DGQA ના કડક માપદંડોને પૂરા કરવા માટે સક્ષમ છે. રોકાણકારો માટે આ એક સંકેત છે કે હવે ડિફેન્સ સેક્ટરમાં મોટા PSUs ની સાથે સાથે ખાનગી અને ચપળ કંપનીઓ માટે પણ મોટી તકો ઊભી થઈ રહી છે.