Eureka Forbes సంస్థకు ఉత్తరప్రదేశ్ పన్ను అధికారుల నుంచి భారీ GST నోటీసు అందింది. 2022-23 ఆర్థిక సంవత్సరానికి సంబంధించి రూ. 273.40 కోట్ల పన్ను చెల్లించాలని అధికారులు కోరగా, దీనిని కంపెనీ కొట్టిపారేసింది.
నోటీసులో ఏముంది?
యూపీలోని లక్నోకు చెందిన డిప్యూటీ కమిషనర్ ఆఫ్ స్టేట్ టాక్స్ ఈ షోకాజ్ నోటీసును జారీ చేశారు. ఇందులో ప్రధానంగా రూ. 149.21 కోట్ల పన్ను బాధ్యత, రూ. 109.27 కోట్ల వడ్డీ, మరియు రూ. 14.92 కోట్ల పెనాల్టీ కలిసి మొత్తం రూ. 273.40 కోట్లు చెల్లించాలని పేర్కొన్నారు.
ఎందుకు వివాదం?
ఈ నోటీసుపై Eureka Forbes మేనేజ్మెంట్ అసహనం వ్యక్తం చేసింది. అధికారులు తమకు కేవలం యూపీ రాష్ట్రానికి సంబంధించిన లావాదేవీలపై పన్ను వేయాల్సింది పోయి, దేశవ్యాప్త (Pan-India) డేటాను పరిగణనలోకి తీసుకున్నారని కంపెనీ ఆరోపించింది. అందుకే ఈ నోటీసులో ఎటువంటి 'మెరిట్' లేదని స్పష్టం చేసింది.
కంపెనీ స్టాండ్ ఏంటి?
చట్టపరంగా ఈ నోటీసు చెల్లదని, దీనిని ఎదుర్కోవడానికి తాము సిద్ధంగా ఉన్నామని కంపెనీ పేర్కొంది. దీనివల్ల కంపెనీ కార్యకలాపాలకు లేదా ఆర్థిక ఆరోగ్యానికి ఎటువంటి ముప్పు లేదని ఇన్వెస్టర్లకు భరోసా ఇచ్చింది. తదుపరి విచారణలో భాగంగా కంపెనీ నిర్ణీత గడువులోగా అధికారులకు సమాధానం ఇవ్వనుంది.