Dodla Dairy એ FSSAI દ્વારા સંભવિત કાયદાકીય કાર્યવાહીના અહેવાલો પર મોટો ખુલાસો કર્યો છે. કંપનીનું કહેવું છે કે ટેસ્ટિંગ રિપોર્ટ્સમાં વિસંગતતા છે અને જે નમૂનો લેવાયો હતો તે એક્સપાયરી પછી તપાસવામાં આવ્યો હતો, તેથી હાલ બિઝનેસ પર કોઈ અસર નથી.
FSSAI વિવાદ પર કંપનીનો પક્ષ
Dodla Dairy એ તાજેતરમાં સોશિયલ મીડિયા પર વાયરલ થયેલા FSSAI ના પોસ્ટ બાદ આ બાબતે સત્તાવાર નિવેદન આપ્યું છે. આ સમગ્ર મામલો 09 જાન્યુઆરી 2026 ના રોજ તામિલનાડુના નીલાકોટ્ટાઈ પ્લાન્ટમાંથી લેવાયેલા 500 ml 'ફુલ ક્રીમ મિલ્ક'ના સેમ્પલ સાથે જોડાયેલો છે. કંપનીએ સ્પષ્ટ કર્યું છે કે તેમને હજુ સુધી રેગ્યુલેટર તરફથી કોઈ પણ પ્રકારનો પ્રોસિક્યુશન ઓર્ડર મળ્યો નથી.
રિપોર્ટ્સમાં કેમ છે વિરોધાભાસ?
રોકાણકારો માટે આ બાબત ચિંતાનો વિષય હતી, પરંતુ કંપનીએ ટેસ્ટિંગના રિપોર્ટ્સ વચ્ચેની મોટી ખાઈ તરફ ઈશારો કર્યો છે:
- પ્રાઈમરી લેબ રિપોર્ટ (20 જાન્યુઆરી 2026): આમાં દૂધ માત્ર 'સબસ્ટેન્ડર્ડ' હોવાનું જણાયું હતું અને તેમાં કોઈપણ પ્રકારના કેમિકલ કે ડિટર્જન્ટ હોવાની સ્પષ્ટ ના પાડવામાં આવી હતી.
- રેફરલ લેબ રિપોર્ટ (20 માર્ચ 2026): આ જ સેમ્પલને બે મહિના પછી 'અનસેફ' ગણાવી તેમાં ડિટર્જન્ટ અને કોસ્ટિક સોડા હોવાનો દાવો કરાયો છે.
કંપનીનું કહેવું છે કે જે સેમ્પલનું ટેસ્ટિંગ 20 માર્ચ ના રોજ થયું, તેની 'બેસ્ટ બીફોર' ડેટ 12 જાન્યુઆરી 2026 હતી. એટલે કે પ્રોડક્ટની લાઈફ પૂરી થયાના 2 મહિના પછી ટેસ્ટિંગ કરવામાં આવ્યું હતું.
આગળ શું?
કંપનીએ 24 એપ્રિલ 2026 ના રોજ જ FSSAI ને પોતાની રજૂઆત કરી દીધી છે. મેનેજમેન્ટે પુષ્ટિ કરી છે કે હાલમાં કંપનીના નાણાકીય કે ઓપરેશનલ કામકાજ પર કોઈ નેગેટિવ અસર નથી. ભવિષ્યમાં SEBI ના નિયમો મુજબ કોઈ પણ મહત્વની અપડેટ આવશે તો શેરહોલ્ડરોને જાણ કરવામાં આવશે.